Verkætlanarstuðul

Vegleiðing til verkætlanarstuðul

NORA játtar stuðul til samstarvsverkætlanir, har í minsta lagi tvey av teimum fýra NORA-londunum (Grønland, Ísland, Føroyar og Stranda-Noreg) eru við. Felags fyri ætlanirnar er, at tær skulu vera í samsvari við aðalmálið hjá felagsskapinum: at skapa eitt sterkt og máttmikið norðuratlantiskt øki, ið er eyðkent av einum sterkum og burðardyggum búskapi. Øll – fyritøkur, almennir stovnar, privat o.o. – kunnu søkja.

NORA kann veita stuðul bæði til verkætlanir, ið taka eitt ár, og verkætlanir, ið taka trý ár við í mesta lagi 500.000 kr. um árið, har hámarkið er 1,5 mió. kr. fyri alt tíðarskeiðið. Umsóknir til verkætlanir skulu vera tilætlaðar og raðfestar í høvuðsøkjunum hjá NORA, ið eru lýst í Verkætlanarskránni 2017-2020. Í partinum “Vit umhugsa at søkja” ber til at lesa meira um hesi øki, ið eisini verða lýst gjøllari í sjálvari verkætlanarskránni.

Harumframt leggur NORA eisini dent á at menna samstarvið við norðurlendsku grannarnar fyri vestan. NORA vil tí fegin hava verkætlanir, ið eisini fevna um felagar serliga úr Kanada og Skotlandi.

NORA veitir vanliga IKKI stuðul til verkætlanir, ið eru at meta sum granskingar- ella menningarætlanir.

Henda vegleiðing til verkætlanarumsókn veitir góð ráð og leiðbeining, tá ið søkt verður, og um týðandi spurningar í hesum sambandi.

Í “Vit umhugsa at søkja” og “Vit skriva eina umsókn” verða nakrir av spurningunum, ið kunnu koma fram svaraðir, um tú umhugsar at søkja, ella tú skrivar eina veruliga umsókn.

Í “Vit hava fingið fíggjarliga játtan” og “Vit eru í ferð við verkætlanini” ber til at lesa meira um treytir, frágreiðing og útgjald, um verkætlanin fær stuðul. Í “Vit eru næstan liðug við verkætlanina” ber til at lesa um krøvini til frágreiðingina og roknskap í sambandi við at verkætlanin verður liðug.

01.10.2018 er seinasta freist at søkja um verkætlanarstuðul í hesum umfari.