NORA pillugu
NORA iliuuseriniakkatut pilersaarut 2026
Atlantikup Avannaani Suleqatigiiffiup (NORA-p) nunani atlantikup avannaaniittuni ineriartortitsineq mingutsitsiffiunngitsoq, unammillersinnaasoq inuiaqatigiillu imminnut napatiffiat peqataaffigaa, ilaatigut Nunat Avannarliit ilaanni atlantikup avannaaniittuni sulianik ingerlatallit soqutiginaatillit suleqatigiinnissaannik kajungilersitseqataaniarnikkut aallartitsisarnikkullu. Sumiiffinni ingerlatat aalajangersimasut pillugit iliuusissatut pilersaarut 2030-mut anguniagaq NORA-p taperserpaa. NORA-p ukiunut 2025-miit 2028-mut periusissiaata takutippaa NORA tassaasoq kattuffik suliniutinik tapersiisoq, oqaluuserisassanik saqqummiussisartoq suleqatigiissitsisartorlu, periusissiallu suleqatigiinnissami sammineqartussat pingaarnersiorneqarnissaat tikkuussiffigaa.
1. Qinnuteqartitsinerit marluk
Suliniutinut tapersiisarneq NORA-p periusissatut pilersaarusiaani nunallu immikkoortuini politikkikkut suleqatigiinnissamut pilersaarummi Vision 2030-mi anguniarneqartut angunissaannut pingaaruteqarpoq. Suliniutinik tapersiineq aqqutigalugu NORA-p nunani suliaqarfimmini suliaqartunut qanimut attaveqarnera nukittorsarneqartarpoq. Ullut qinnuteqarfissatut killiliussat tassaapput martsip aallartinnerani 2026 kiisalu oktobarip aallartinnerani 2026. Qinnuteqarnissamut killiliussat sioqqulluarlugit NORA qinnuteqarusussinnaasunut webinarinik ingerlatsilluni pikkorissaasarumaarpoq, taakku skandinaviamiutut tuluttullu ingerlanneqartassapput.
2. Kalaallit nunaanni siuttunut suliniut
NORA-mi siuttuuneq 2026-mi Kalaallit Nunaata tigussavaa. Suliniut una NORA-p iliuuseriniakkatut pilersaarutaanut ilaassaaq, pingaarnertullu pikkorissaaneq, attaveqarfiit, aaqqissuussinikkullu nukittorsarneqarneq aallunneqassallutik.
3. Barentsip allaffeqarfia suleqatigissallugu isumaqatigiissut
Suleqatigiissitsisartuunermut atatillugu nunani suliaqarfitsinni suleqatigisartakkavut allat suleqatigineri nukittorsarumallugit NORA suliniuteqarniarpoq. Siullertut Barentsip Allaffeqarfiata suleqatiginera aallunneqassaaq, taakkua suliaqarfii immikkullu sammisaat suliaqarfitsinnut attuumassuteqarsinnaasarmata, suleqatigiinnissarlu tamatsinnut iluatinnarsinnaasutut nalilerneqarmat.
4. Generation Nordic
Inuusuttunik peqataatitsineq inuusuttunullu atuutilersitsineq NORA-p suliaqarfiini tamani ilaasarpoq. 2026-mi nunani suliaqarfitsinni suleqatigisartakkavut suleqatigalugit Generation North Atlantic II-p, maanna Generation Nordic-imik taaneqartartup, ingerlanneqarnissaa sulissutigineqarpoq.
5. Silver Economy Award 2026
Utoqqaat inuiaqatigiinnut tunniussisinnaanerat NORA-p 2025-2028-mut pilersaarusiornerani sammineqartut ilagaat, sammisarlu taanna avammut nittarsaakkumallugu iliuuserineqarsinnaasut ilagaat maligassiulluartutut piukkunnarsinnaasunik saqqummiussineq. Suliaq pineqartoq 2026-mi aallarnerneqassaaq, taamaammallu nunani suliaqarfitsinni utoqqarnik inuiaqatigiinni siuarsaaqataallutik maligassiuisunik ujartuineq ingerlavoq. Suliaq naggaserlugu maligassiuilluarnerpaat nersornaaserneqarumaarput, tamannalu aaqqissuussinermi tamatumunnga tulluarsorineqartumi ingerlanneqarumaarpoq. (Ass. Arctic Frontiers imaluunniit Arctic Circle). Ajugaasoq aningaasarsiassartalimmik nersornaaserneqarumaarpoq.
6. Nunanik kimmut sanilerisanik suleqateqarneq
Nunanik kimmut sanilerisanik suleqateqarneq NORA-p suliaani tamani ilaatinneqartarpoq, tassa imaappoq nunanit kimmut sanilerisanit peqataatitsisoqarsinnaanersoq misissorneqartuaannarpoq. Shetlandimiut NORA-p suleqatiginissaanut soqutiginninnerat pissutaalluni Shetland immikkut sammillugu paasissutissiilluni suliniummik ingerlatsinissaq eqqarsaatersuutigineqarpoq.