Suliniutinut tapiissutit

Itigartitsineq

Suliniutinut qinnuteqaatit, NORA-mut nassiunneqartut, suliniummut tapersiisarnermut malittarisassat atuuttut naapertorlugit suliarineqartarput. Tamanna isumaqaannarpoq qinnuteqartup paasissutissat, uppernarsaatit ilaalu ilanngullugit pillugit pisortatigoortumik piumasaqaatit kiisalu anguniakkat allattorneqarsimasut, periusissanut pisussanut pilersaarummi nassuiarneqartut, naammassisimassagai.

NORA-mi komite-p suliniutinut qinnuteqaatit pisortatigoortumik suliarisarpai. Taamaalilluni suliniummut tapersiisoqassanersoq tapersiisoqassannginnersorluunniit komite aalajangiisarpoq. Komite pisuni aalajangersimasuni qinnuteqaatip akuerineqarnissaanut piumasaqaateqarsinnaavoq, soorlu assersuutigalugu suliniummi amerlanerusunik suleqateqarnissamik piumasaqaateqarluni. Aalajangiinermi suliniutinut qinnuteqaatit ataasiakkaat tamarmik ilisimasaqartunit oqallisigalugu suliarinninneq tunngavigineqartarpoq, tamatuma kingorna isumaqatigiinnermi aalajangiisoqartarluni.

Komite qinnuteqaammut itigartitsippat, tamanna komite-p suliniummik ataatsimoortumik nalilersuinerannut takussutissaassaaq, assersuutigalugu makkununnga tunngatillugu:

  • NORA-mi pingaarnersiuinermi salliutinneqartunut attuumassuteqarnera
  • iluatsitsilluarnissamik periarfissaqarneq
  • suliniutaasimasut imaluunniit suliniutit tassunga assigusut
  • suleqatigiittussat katitigaanerat
  • missingersuutit piviusorsiunngitsut

Tamatuma saniatigut suliniut arlalinnik naleqquttunik pitsaassuseqarsinnaavoq, kisianni ataatsimoortumik naliliineq tunngavigalugu, suliniutinut ingerlasunut allanut sanilliullugu pitsaannginnerusutut isikkoqarsinnaalluni. Pisuni taamaattuni suliniutit pitsaanerusutut naliliiffigineqartut salliutinneqassapput. Komite-p qinnuteqartumut akissuteqaammi itigartitsinermut tunngavilersuutaasoq allassavaa.

Allaffissornikkut itigartitsineq

Qinnuteqaammi piumasaqaatit imaluunniit malitassat tunngaviusut naammassineqarsimanngippata, qinnuteqaat allaffissornikkut itigartinneqassaaq. Assersuutigalugu imaassinnaavoq suliniummi nunanit NORA-mi ilaasortaasunit minnerpaamik marlunnit suleqataasoqannginnera pissutaasoq, imaluunniit suliniut NORA-mi qulequttat pingaarnersiuinermi salliutinneqartut avataanniilluinnartoq.

Allattoqarfiup qinnuteqaat allaffissornikkut itigartippagu, komite-p qinnuteqaat suliarissanngilaa.

Itigartitsinerup kingorna qisuariarneq

Komite-p aalajangiinera inaarutaasuummat, itigartitsinerup suliarineqarnera qanoq ingerlaqqissanersoq, qinnuteqartup nalilersuinissaa pingaaruteqarpoq. Periarfissaq tassaasinnaavoq suliniut NORA-mit aningaasaliivigineqarani ingerlanneqarsinnaasoq. Immaqaluunniit qinnuteqartoq, assersuutigalugu tunngavilersuutaasut isumassarsiorfigalugit, tullianik qinnuteqaatinut piffissamut killiliussap tungaanut qinnuteqaateqaqqinnissaq siunertaralugu suliniummik iluarsaassilluni. NORA-p allattoqarfiisa qullersaqarfiat imaluunniit Kalaallit Nunaanni, Island-imi imaluunniit Norge-mi nunap immikkoortuani allattoqarfiit arlaat, aamma ikiuussinnaavoq ilitsersuisinnaallunilu.