Nora

NORA pillugu naatsumik

Atlantikup Avannaani Suleqatigiiffik (NORA) tassaavoq Nunani Avannarlerni Ministerit siunnersuisooqatigiit nunap immikkoortuini politikkikkut suleqatigiinnissamut pisussanut pilersaarutip ataani naalakkersuisut suleqatigiiffiat, tassaniillutik Kalaallit Nunaat, Island, Savalimmiut aamma Norgep sineriaa. Aaqqissuussaanermi Nunani killerni suleqatigiinneq 1981- imeersoq tunngavigineqarpoq aammalu NORA-nngorluni, tassami Norgep sineriaa 1996-imi suleqatigiinnermi ilaalermat. Nunat NORA-miittut nunami sumiiffinni inissisimaffitsik, assigiimmik
ilisarnaateqarnertik, assigiinnik anigorniagassaqarnertik kiisalu oqaluttuarisaanikkut, sullissivitsigut kulturikkullu ataqatigiinnertik tunngavigalugit imminnut atasuupput.

Atlantikup avannaa nunani avannarlerni nunap immikkoortuatut kimittuutut inissitsinniarlugu, NORA nunap immikkoortuani suleqatigiinnermut nukittorsaaqataavoq, sakkortuumik, piujuartitsiviusumik aningaasaqarnikkut ineriartortitsineq ilisarnaataalluni. Tamanna ilaatigut inuussutissarsiornermut suliffeqarfiit aamma ilisimatusarnermut ineriartortitsinermullu aaqqissuussaanerit akornanni nunap killeqarfii akimorlugit suleqatigiinnerup nukittorsarneqarneratigut ingerlanneqarpoq.

NORA Nunani Avannarlerni Ministerit siunnersuisooqatigiinnit aningaasalersorneqarpoq nunanit sisamanit suleqatigiinnermi peqataasunit nunami namminermi tapiisarnermit tapertaqartinneqartumik. Allattoqarfiit qullersaqarfit Savalimmiuni Tórshavn-imi inissisimavoq. Nunat sinnerini Kalaallit Nunaanni, Island-imi, Norgep kitaani aamma Norgep avannaani allattoqarfiit inunnik attaveqaataasunik inuttaqartinneqarput.

NORA-mi komite 12-inik ilaasortaqarpoq, NORA-mi nunap immikkoortuani nunat tamarmik immikkut pingasunik aallartitaqarlutik. Komite NORAp periusissanut pisussanut pilersaarutaani, nalinginnaasumik ukiunut sisamanoortumut, malitassanik pingaarnernik aalajangersaasarpoq. Tapiliullugu NORA-mi komite ukiumoortumik iliuusissanut pilersaarummik suliaqartarpoq, tassani ingerlatassat aalajangersimasut NORA-p ukiup ingerlanerani ingerlanniagai, nassuiarneqartarlutik.

NORA ineriartortitsivissat pingasut nassuiagaasut malillugit sulivoq, tassani makkua aallunneqarlutik:

NORA suliniutinut tapersiisartoq, nunap immikkoortuani naapeqatigiittarfimmik annertuumik pilersuisussaq, aammalu suliassaqarfinnut pingaarnersiuinermi salliutinneqartunut amigaataasunik naammattunik pissarsinissamut periarfissiisussaq.

NORA oqaluuserisassanik aalajangersaasartoq, periusissat atorlugit suliniuteqarnikkut aamma suliniutini paasisat atorlugit, nunap immikkoortuani oqaluuserisassanut sunniisussaq.

NORA peqatigiilersitsisoq, ataatsimoorluni suliniuteqarnerit pillugit suleqatigiinnikkut sapinngisamik annertunerpaamik sunneeqatigiissitsinissaq anguniarlugu, suliaqartuusut aamma kattuffiit nunap immikkoortuani suliaqartut akornanni attaveqatigiinnernik pilersitsisussaq kiisalu attaveqatigiinnernik pioreersunik ineriartortitsisussaq.

Suliniutinut tapersiisarneq

NORA suleqatigiilluni suliniutinut aalajangersimasunut, minnerpaamik nunanit NORA-mi ilaasortaasunit marlunnit suleqatigiiffigineqartunut, aningaasalersuinermut tapersiinissamut neqerooruteqarpoq. NORA kattuffittut suliniutini taakkunani suleqataanngilaq, kisianni suliniutit anguniakkanut NORA-p periusissanut pisussanut pilersaarutaani nassuiarneqartunut iluaqutaasussatut naliliiffigineqarpata, taakkununnga aningaasaqarnikkut tapersiisarluni. Ataatsimut isigalugu inuussutissarsiortut suliaqartuusut aamma NORA-mi nunap immikkoortuani nunani sisamani taakkunani suliaqartuusut allat akornanni suleqatigiinnerup nukittorsarneqarnissaa aallunneqarpoq.

Ukiumut marloriarluni tapersiivigineqarnissamik qinnuteqartoqarsinnaavoq. NORA-p suliniutinut tapersiisarnera pillugu annertunerusumik atuarit uuma ataani Suliniutinut tapiissutit.

Periusissatigut suliniuteqarnerit

NORA periusissatigut suliniutinik, NORA-mi nunap immikkoortuani nunat sisamat, Savalimmiut, Kalaallit Nunaata, Island-ip aamma Norgep sineriaata akornanni suleqatigiinnerup nukittorsarneqarnissaanut iluaqutaasussanik, aallartitsisarpoq peqataasarlunilu. NORA assersuutigalugu nunap immikkoortuani ajornartorsiutit sammillugit ataatsimeersuartitsisarpoq aammalu misissueqqissaarnernik suliaqartarluni. NORA ilaatigut nunap imikkoortuani OECD-mi misissueqqissaarnermi suleqataasimavoq, tassani NORA-mi nunap immikkoortuani anigorniagassat periarfissallu paasinarsisinneqarlutik.

NORA aamma suliniutinut naleqquttunut ingerlatsivittut imaluunniit allattoqarfittut atuunnissamut periarfissaqarpoq, soorlu assersuutigalugu Nunani avannarlerni siulersuisoqarfimmi suliniut ”Immap uumasuinik atorluaalluni aningaasarsiorsinnaaneq” (2015-2017).

NORA paasissutissiinernik atlantikup avannaani tamanut ammasumik ingerlatitseqqiisarpoq. Nutaarsiassat nammineq suliarineqartut NORAp nittartagaanut ikkunneqartarput. Tamatuma saniatigut nunap immikkoortuani nutaarsiassat aamma aaqqissuussinerit pillugit inassuteqaatit ingerlaavartumik uunga facebook.com/noraregion kiisalu twitter-imut ikkuttarpavut.